Sabtu, 27 Juli 2013

#Urang Sunda "Acuk Bedug"

Mohon maaf, kepada kawan-kawan yang tidak mengerti bahasa sunda, anda boleh skip tulisanku kali ini. Terima kasih.

Sampurasuun!!! Asa tos lami teu nyerat dina basa sunda. Derrr ah, mang!

"Acuk bedug" nyaeta basa sejen tina "Baju Lebaran". Biasana istilah heuheureuyan ieu sok dipake ku kuring jeung babaturan jang ngaheureuyan jalma sejen anu meuli atawa make baju lebaran. Contona "Adeuuuh, aya anu tos meser acuk bedug..." atawa "Wah jigana anu dipake ayeuna teh acuk bedug yeuh...?" Muehehehe.

Lamun nyinggung soal baju lebaran, pasti moal bisa leupas ti budak leutik atawa ingetan urang wanci keur leutik, soalna jang barudak leutikmah meuli baju lebaran teh jiga nu geus jadi kawajiban, da asa piraku oge babaturan na nu lain marake baju anyar ari manehna henteu mah, asa ngenes pisan, sanajan teu saeutik anu geus dewasa oge anu sok pipilueun rariweuh lamun geus nyangkut kana perkara ieuteh. Kadang lamun dipikir deui ku kuringmah, sok asa teungteuingeun.

Saacan nulis ieu, kuring geus maca sababarahiji artikel anu ngabahas tema ieu. Mayoritas artikel anu ku kuring dibaca ngungkapkeun statement anu sarua, nyaeta yen kabiasaan masyarakat urang meuli baju lebaran teh seolah geus jadi budaya, nu akhirna kabiasaan ieu bisa ngajadikeun masyarakat jadi mikaboga budaya konsumerisme. Malahan lamun kuring mikir leuwih jauh deui, bisa-bisa sababaraha pihak malah kaeuntereupan budaya hedonisme, nu akibatna budaya-budaya etateh kalah ngajauhkeun jalma tina nilai-nilai agama, Islam khususna. Jeung lamun meuli baju anyar dina waktu lebaran  geus jadi budaya, artina kuringteh jelema anu teu berbudaya atuh, soalna geus sababaraha lebaran katukang ieu, kuring tara meuli/make baju anyar wanci lebaran. Deeeeng teuing...

Tapi da soal etamah hak masing-masing pribadi nya? kumaha niatna oge, lamun niatna jang ngajaga kaendahan jeung kabersihan, nya etamah beda perkara, da soal etamah disarankeun dina agama oge. Ngan anu perlu dikontrol teh nyaeta nafsu na meureun, ngajaga sangkan urang ulah tepi kalap dina ngalakonan na, sanes kitu? Nya ieumah saukur eunteung hungkul, da kuring oge teu ngarasa geus jadi jalma bener. Urang silih ingetan.

Kumargi tos nyangkolong kana waktos, waktosna kulem maksadna hehe, sapertosna dicekapkeun sakieu wae basa-basi ti sim kuring dina wengi ieu. Wilujeng.